आज (शुक्रबार) पनि देशका विभिन्न सहरमा सरकार र प्रहरी दमनविरुद्ध शान्तिपूर्ण प्रदर्शन भएको छ । कोभिड–१९ रोकथाम र जाँचमा ढिलासुस्ती गरेको, सरकारी खर्च पारदर्शी नभएको भन्दै शुक्रबार पनि युवाहरू मुख्य सहरहरुमा सरकार विरोधी प्रदर्शन जारी राखेका छन् ।

काठमाडौंको नक्सालमा बिहीबारको सरकारको विरोधी प्रदर्शनमा प्रहरीले दमन गरेको बन्दै शुक्रबार बसन्तपुर दरबार क्षेत्रमा युवाहरुले शान्तिपूर्ण प्रदर्शन गरेका छन् । त्यस्तै धुलिखेल, बुटवल, जनकपुरधाम र विरगञ्जका मुख्य सडकमा आज पनि युवाहरुले शान्तिपूर्ण प्रदर्शन गरेका छन् ।

सरकारले कोरोना संक्रमण जाँचका लागि पीसीआर बढाउन, क्वारेन्टाइनको गुणस्तर सुधार गर्न, मेडिकल क्षमता विस्तार गर्न र खर्च पारदर्शी बनाउन माग गर्दै बिहीबारदेखि देशैभर स्वस्फूर्त प्रदर्शनमा उत्रेका छन् । प्रदर्शनमा मुख्यगरी युवा तथा व्यवसायीलगायत संलग्न छन् ।

उनीहरुले ‘हार्मी भोट दिन्छौं, सरकार चोट दिन्छ, कुर्सी मुनी कार्पेट, कार्पेट मुनी जनता, रोग कि भोक, नेपाली नै नरहे नेपाल कहाँ रहला’ जस्ता प्ले कार्ड बोकेर शान्तिपूर्ण प्रशर्दन गरेका छन् ।