टेस्लाका संस्थापक एलन मस्कले आफ्नै कम्पनीको शेयर मूल्य अति नै धेरै भएको ट्वीट गरेपछि कम्पनीको मूल्य १० अर्ब डलरले घटेको छ । उनको ट्वीटपछि लगानीकर्ताहरु कम्पनीबाट पछि हटेका थिए जसले गर्दा उनी आफैलाई पनि ३ अर्ब डलरको घाटा लागेको छ ।
‘मेरो विचारमा टेस्लाको शेयर मूल्य निकै उच्च छ,’ उनले ट्वीटमा भनेका थिए । लगातार ट्वीट गरेका उनले आफ्नो सबै सम्पत्ति बेच्नेदेखि आफ्नो प्रेमिका आफूसँग क्रुद्ध रहेको सम्म लेखेका थिए ।
Tesla stock price is too high imo
— Elon Musk (@elonmusk) May 1, 2020
यसरी मस्कको ट्वीटको कारण कम्पनीलाई घाटा भएको यो पहिलो अवसर भने होइन । सन् २०१८ मा न्युयोर्कको स्टक बजारमा टेस्लाको भविष्यबारे ट्वीट गर्दा उनी विवादमा तानिएका थिए । जसमा नियामक निकायले उनलाई २ करोड डलर जरिवाना तिराएका थिए भने कुनै ट्वीट गर्न अघि वकिललाई देखाएर मात्र प्रकाशित गर्ने सहमति गरेका थिए ।
My gf @Grimezsz is mad at me
— Elon Musk (@elonmusk) May 1, 2020
सन् २०१८ मा मस्कले आफूले टेस्लालाई स्टक बजारबाट हटाउनका लागि लगानी प्राप्त गरेको उल्लेख गरेपछि कम्पनीको शेयर मूल्यमा उतारचढाव देखिएको थियो । यो घटनापछि सेक्युरिटी एन्ड एक्सचेन्ज कमिसनले उनलाई जरिवाना तिराउनुको साथै यस्तो फेरि हुन नदिन उनको ट्वीटमा नियन्त्रण गर्न आदेश दिएको थियो ।
वाल स्ट्रीट जर्नलका अनुसार उसले अर्बपति मस्कलाई ‘सो ट्वीट जिस्केर लेखेको वा अरुले नै लेखेको हो ?’ भनेर सोधेको थियो । जसमा उनले मात्र ‘होइन’ भन्ने जवाफ दिएका थिए ।
टेस्लाको सेयर मूल्य यो वर्ष निकै वृद्धि भएको थियो । जसले गर्दा विद्युतीय कार निर्माता कम्पनीको मूल्य १ खर्ब डलर नजिक पुगेको थियो । यो कोशेढुंगा पुगेको भए मस्कले करोडौँ डलर बोनसको रुपमा पाउने थिए ।
३.३४ करोड फलोअर्स भएका मस्कले गत हप्ता कोरोनाभाइरसका कारण घरमा बस्नुपर्ने नीतिको कडा आलोचना गरेका थिए । सन् २०१९ मा पनि ट्वीटका कारण उनी अदालतसम्म पुग्नुपरेको थियो ।
स्रोत : बीबीसी
१.
२.
३.
