उदयपुरको त्रियुगा नगरपालिका–३, भुल्केका थप ८ जनामा कोरोना संक्रमणको आशंकामा कोरोना विशेष अस्पताल धरान लगिएको छ । केही दिनअघि भुल्केमा बसेका १२ जनामा कोरोनाको सङ्क्रमण भएपछि वैशाख ६ गते ६९ जनाको स्वाब संकलन गरिएको थियो ।
स्वाब संकलन गरिएकामध्ये आठ जनामा कोरोना सङ्क्रमणको शंका लागेपछि धरान पठाइएको जिल्ला जनस्वास्थ्य प्रमुख मोहन सुवेदीले जानकारी दिए । ‘स्वाबको पुनः परीक्षणका आठ जनालाई धरान लगिएको हो, संक्रमण भएको नभएको पुष्टि परीक्षण पछि मात्र थाहा हुन्छ’ सुवेदीले रोतोपाटीसँगको कुराकानीमा भने । केही दिनअघि भुल्केको मस्जिदमा १२ जनालाई कोरोना संक्रमणको पुष्टि भएको थियो । त्यसलगत्तै वरिपरिको बस्तीलाई लक गरिएको छ ।