सर्लाही — सर्लाहीको सदरमुकाम मलंगवामा आज एक दिनका लागि माछामासु तथा मदिरा बिक्री–वितरणमा पूर्ण प्रतिबन्ध लगाइएको छ। विवाह पञ्चमीको अवसरमा नगरक्षेत्रभित्र कुनै पनि पशुपन्छी वा जीवजन्तुको वध नगर्न, मदिरा र माछामासु बिक्री रोक्न नगरपालिकाले आग्रह गरेको हो।

नगरपालिकाको प्रशासन शाखाका प्रमुख रामपुकार यादवले जारी गरेको सूचनामा आजको दिन मदिरा तथा माछामासु बिक्री नगर्न सबै व्यापारिक प्रतिनिधि र स्थानीयलाई अनुरोध गरिएको उल्लेख छ।

त्यसैबीच, मलंगवाका स्थानीयवासीले जनकपुरधामको झैँ विवाह पञ्चमी पर्वको अवसरमा नगर परिक्रमा गराउँदै राम–सीताको प्रतीकात्मक विवाह कार्यक्रम आयोजना गर्ने तयारी मिलाएका छन्।