भोजपुर । प्रहरीले जिल्लाका विभिन्न डाँडापाखामा आफैं उम्रिएका करिब ८ हजार गाँजाका बोट तथा बेर्ना नष्ट गरेको छ। कोशी प्रदेश प्रहरी कार्यालय विराटनगरको सुरक्षा सुनिश्चितता अभियानअन्तर्गत यस साता भोजपुरको हतुवागढी र आमचोक गाउँपालिकाका विभिन्न स्थानमा अभियान सञ्चालन गरिएको हो।

इलाका प्रहरी कार्यालय घोडेटार, इलाका प्रहरी कार्यालय बोयाङ, प्रहरी चौकी हसनपुर र अस्थायी प्रहरी चौकी दुम्मानाबाट खटिएको टोलीले करिब ४३ रोपनी क्षेत्रफलमा उम्रिएका ४ हजार २ सय गाँजाका बोट र ३ हजार ८ सय गाँजाका बेर्ना फडानी गरेको जिल्ला प्रहरी कार्यालय भोजपुरले जनाएको छ।

प्रहरीले जिल्लाभर लागूऔषध गाँजाको बोट तथा बेर्ना देखिने स्थानमा निरन्तर अभियान सञ्चालन गर्दै नष्ट गर्दै आएको छ।