सुनसरी — सप्तकोशी नदीमा पानीको सतह लगातार बढ्दै गएपछि कोशी ब्यारेजका ३४ ढोका खोलिएका छन्। जिल्ला प्रहरी कार्यालय सुनसरीका प्रवक्ता योगराज खतिवडाका अनुसार, आज दिउँसो ४ बजे पानीको प्रवाह प्रतिसेकेण्ड २,५६,०१० क्युसेक पुगेको छ।

यसअघि दिउँसो ३ बजे २,४९,१०५ क्युसेक प्रवाह मापन गरिएको थियो भने आइतबार राति १० बजे २,२६,५६० क्युसेक पुगेको थियो। कोशी ब्यारेजका ५६ ढोकामध्ये अहिले ३४ ढोका खोलिएको छ।

पानीको बहाव १.५ लाख क्युसेक नाघेपछि खतराको संकेतस्वरूप रातो बत्ती बाल्ने गरिएको छ। हाल रातो बत्ती बालिएको कन्ट्रोल रुमले जनाएको छ। पहाडी क्षेत्रमा भइरहेको लगातार वर्षाका कारण जलसतह अझै बढ्न सक्ने अनुमान गरिएको छ।