विराटनगर । भारतको पटना स्थित एमिटी युनिभर्सिटी र कोशी प्रदेशको मनमोहन प्राविधिक विश्वविद्यालय (एमटीयू) विच शैक्षिक तथा प्राविधिक सहकार्यका लागि सम्झौता भएको छ ।
एमिटी युनिभर्सिटीको स्कूल अफ ट्रेनिङ एण्ड लर्निङ र एमटीयूको स्कृल अफ एप्लाईड साईन्स टेक्नोलोजी एण्ड ल विच शैक्षिक तथा प्राविधिक सहकार्यका लागि सम्झौता भएको हो ।

गतहप्ता सम्पन्न सम्झौता अनुसार एमिटी र एमटीयूले आआफना शैक्षिक कार्यक्रम, अनुसन्धान, तालिम र विद्यार्थी आदान–प्रदानका क्षेत्रमा सहकार्य गर्नेछन । विज्ञान, प्रविधि, इञ्जिनियरिङ लगायतका विषयमा संयुक्त परियोजना सञ्चालन, कार्यशाला, सेमिनार तथा इन्टर्नशिपमार्फत विद्यार्थीलाई व्यावहारिक अवसर दिने योजना आदानप्रदान हुनेछ ।

एमटीयूले नेपालका विद्यार्थीलाई अन्तर्राष्ट्रियस्तरको तालिम र अध्ययन–अनुसन्धानमा एमिटीउसँग जोडनेछ भने एमिटीले पाठ्यक्रम विकास, तालिम कार्यक्रम सञ्चालन तथा प्राविधिक स्रोत उपलब्ध गराउने जिम्मेवारी लिनेछ ।

सम्झौतापत्रमा एमटीयूको तर्फबाट रजिष्टार डा दिलनाथ फुँयाल र ईन्स्टिच्युट अफ लका प्रिन्सिपल कोषराज न्यौपाने र एमटियूको तर्फबाट कुल सचिव डा एनके यादव र कानुन विभाग अध्यक्ष डा राजिव रंजन झाले संयुक्त्त रुपमा हस्ताक्षर गरेका छन । सम्झौता हस्तान्तरण कार्यक्रममा एमिटी तर्फबाट कुलपति प्रो. अर्चन ठाकुर, विधि विभाग प्रमुख प्रो. राजीव राय र विश्वविद्यालयका अन्य वरिष्ठ अधिकारी उपस्थित थिए। मनमोहन प्राविधिक विश्वविद्यालयतर्फ रजिष्टार डा दिलनाथ फुयाल, प्रचार्य कोषराज न्यौपाने लगायतका पदाधिकारीहरुको उपस्थिति थियो।
एमटीयूका रजिष्टार डा दिलनाथ फुँयलका अनुसार सम्झौता प्रारम्भिक रूपमा ३ देखि ५ वर्षका लागि लागू हुनेछ र आपसी सहमतिमा नवीकरण पनि गर्न सकिनेछ । उनका अनुसार एमिटी युनिभर्सिटी पटना र नेपालको मनमोहन प्राविधिक विश्वविद्यालयबीच भएको शैक्षिक सहकार्यले अन्तर्राष्ट्रिय शैक्षिक सहयोग, विद्यार्थी आदान–प्रदान तथा शैक्षिक उत्कृष्टता बढाउने उद्देश्य पुरा गर्नेछ ।

कोशी प्रदेश सरकारले २०७६ सालमा स्थापना गरेको मनमोहन प्राविधिक विश्वविद्यालयले छोटो समयमै अन्तराष्ट्रिय विश्वविद्यालयसँग शैक्षिक सहकार्य बढाउदै लगेको छ । यसअघि मनमोहनले भारत असामको गुहावटी विश्वविद्यालय , पश्चिम बंगाल युनिभर्सिटीसँग पनि शैक्षिक सहकार्यका लागि एमओयू गरिसकेको छ । यसबाहेक भारत , बंगलादेश र पाकिस्तानका विश्वविद्यालयका विज्ञहकरुलाई स्रोत शिक्षकका रुपमा आमन्त्रण गरेर कक्षा सञ्चालन गराउन थालेको छ । गत महिना एमटियूको कानुन संकायका विद्यार्थीहरुले एमिटी यूनिभर्सिटी भ्रमण गरेर भारतीय संबिधान , कानुन र अदालतको न्याय सम्पादनको प्रकृयाबारे जानकारी लिएका थिए ।

मनमोहनले दस बर्षभित्र दक्षिण एसियामा चिनिने प्राविधिक विश्वविद्यालय बन्ने लक्ष्य लिएको छ ।