हिपमत डटकम
विराटनगर — लामो समयदेखि चल्दै आएको कोशी प्रदेशको नामकरण विवादमा नेकपा (माओवादी केन्द्र) फेरि पनि व्यवहारिक रूपमा “कोशी” नाम स्वीकार गर्ने पक्षमा उभिएको छ। पार्टी अध्यक्ष पुष्पकमल दाहाल ‘प्रचण्ड’ले कोशी नामलाई डि फ्याक्टो (व्यवहारिक रूपमा) स्वीकार गर्नुपर्ने बताएका छन्।
विराटनगरमा आयोजित पार्टीको प्रदेश सचिवालय बैठकमा प्रचण्डले नामकरण प्रक्रियामा पार्टीबाट गल्ती भएको स्वीकार गर्दै भने,
“संविधानसभामा आरक्षण जस्ता विषयमा फरक मत राखेर पनि संविधान पारित गरेका थियौं, कोशीको नाममा पनि त्यसैगरी निर्णय स्वीकार गरेर अघि बढ्नुपर्छ।”
यद्यपि, उनले यो नामलाई डि जुरे (कानुनी रूपमा) भने स्वीकार नगरिने स्पष्ट पारे।
“अहिलेलाई डि फ्याक्टो रूपमा मान्छौं, तर आगामी निर्वाचनपछि दुई तिहाई बहुमत ल्याएर किरात, लिम्बुवान वा कोच जस्ता पहिचानमा आधारित नामको लागि पहल गर्नुपर्छ,” उनले भने।
बैठकमा उनले प्रदेश नेतृत्वलाई नामबारेको सुझाव केन्द्रमा पठाउन निर्देशन समेत दिएका छन्। तर विडम्बनाको कुरा के छ भने, प्रचण्डले “कोशी” नाम स्वीकार गर्ने भनिरहँदा बैठकस्थलमा टाँसिएको ब्यानरमा भने “प्रदेश १” लेखिएको थियो।
२०७९ फागुन १७ मा प्रदेश १ लाई “कोशी” नाम दिइएको थियो। एमाले, कांग्रेस र माओवादीको समर्थनमा नाम पारित भए पनि पहिचानको आधारमा नाम हुनुपर्ने माग गर्दै व्यापक आन्दोलनहरू भएका थिए। आन्दोलनको क्रममा २०७९ चैत ५ मा विराटनगरमा एक आन्दोलनकारीको मृत्युसमेत भएको थियो भने सयौं घाइते भएका थिए।
विरोध चर्किएपछि माओवादी केन्द्रले नामकरणमा त्रुटि भएको स्वीकार्दै पहिचानको पक्षमा उभिने बताएका थिए। त्यसयता पार्टीले आफ्ना दस्तावेज तथा कार्यक्रमहरूमा “प्रदेश १” लेख्न थालेको हो, यद्यपि नेताहरू भने प्रायः “कोशी” नै बोल्दै आएका छन्।
१.
२.
३.
