कञ्चनपुर । भारतसँग सीमा जोडिएको कञ्चनपुरका नाका र भित्री बाटाहरूमा सशस्त्र प्रहरीको बाक्लो उपस्थितिका बीच पनि तस्करी खुलेआम भइरहेको स्थानीयको गुनासो छ। प्रतिबन्धित अण्डा, कुखुरा, चल्लादेखि माछा, पशुजन्य उत्पादन र अन्य व्यवसायिक सामान दिनहुँ सीमा पार हुँदै भित्रिने तर त्यो नियन्त्रण गर्ने जिम्मेवारी पाएको सुरक्षा निकाय नै मिलेमतोमा तस्करीलाई प्रश्रय दिइरहेको आरोप छ।

खल्लामछेट्टीदेखि डोकेबजारसम्मका खुला नाकाबाट हुने तस्करीका कारण सामान्य घरायसी सामान ल्याउने सर्वसाधारणलाई अप्ठ्यारो पर्ने गरेको तर ठूलो मात्रामा सामान भित्र्याउने व्यवसायीलाई भने ‘सेटिङ्ग’ मार्फत सहजै छुट दिइने गरेको स्थानीयको दाबी छ।

भन्सार क्षेत्रमा सशस्त्र प्रहरी, नेपाल प्रहरी, खाद्य, पशु तथा प्लान्ट क्वारेन्टाइनजस्ता निकाय उपस्थित भए पनि तस्करी नियन्त्रणमा खासै चासो नदिएको देखिएको छ। बरामद गरिएका सामान समेत पुनः भन्सार पठाएर राजस्व संकलन भएको देखाउने चलनले लक्ष्यअनुरुप राजस्व उठ्न नसक्ने अवस्था निरन्तर दोहोरिएको भन्सार कार्यालयकै तथ्याङ्कले देखाउँछ।

गत आर्थिक वर्षमा मात्रै ७४ करोड ५५ लाख रुपैयाँ राजस्व संकलन गर्ने लक्ष्यमा करिब ५९ करोड ७७ लाख रुपैयाँ मात्र उठेको भन्सार कार्यालयले जनाएको छ। यसमा समेत ठूलो हिस्सा प्रहरी र सशस्त्र प्रहरीले बरामद गरेका सामानबाट संकलन गरिएको राजस्व रहेको उल्लेख छ।

स्थानीय रोशन चौधरीका अनुसार घरायसी प्रयोजनका सामान्य सामान ल्याउँदा सशस्त्र प्रहरी र नेपाल प्रहरीले कठोर व्यवहार गर्ने तर ठूलो मात्रामा सामान ल्याउने तस्करलाई भने पैसाको सेटिङ्गमार्फत सजिलै बाटो खोलिदिने गरेका छन्। पुनर्वासका जनक तामाङ्ग भन्छन्, “नियमित घरखर्चका सामानमै छेकबार गर्ने, तर व्यवसायीलाई खुलेआम छुट दिने अवस्था छ।”

राजस्व संकलनमा धक्का पुग्ने गरी भइरहेको तस्करीप्रति राज्यका सुरक्षानिकाय र भन्सार विभाग मौन देखिनुले स्थानीयको आक्रोश बढेको छ। डेढ दशकयताकै सबैभन्दा बलियो सुरक्षा उपस्थिति सीमामा भए पनि तस्करी रोक्न नसकिएकोमा सर्वसाधारणले प्रश्न उठाएका छन्।