काठमाडौं, भदौ २७ — मिक्स्ड मार्सल आर्ट्स (एमएमए) फाइटर रवीन्द्र ढाँटलाई काठमाडौं महानगरपालिकाले विशेष सम्मान प्रदान गरेको छ। भारतको नोएडामा आयोजित म्याट्रिक्स फाइट नाइट (एमएफएन)–१७ मा बान्टमवेट च्याम्पियनको उपाधि जितेर फर्किएका ढाँटलाई नगद २ लाख रुपैयाँसहित सम्मान गरिएको हो।

मंगलबार महानगरको कार्यालयमा आयोजित कार्यक्रममा मेयर बालेन्द्र शाह (बालेन), उपमेयर सुनिता डंगोल र प्रमुख प्रशासकीय अधिकृत सरोज गुरागाईंको उपस्थितिमा उनलाई सम्मान गरिएको हो।

च्याम्पियन ढाँटको उपलब्धिले नेपाली खेलकुद क्षेत्रमा अन्तर्राष्ट्रिय स्तरमा थप पहिचान स्थापित गराएको भन्दै महानगरले उनलाई प्रोत्साहनस्वरूप सम्मान गरेको जनाएको छ।