काठमाडौं — तीनकुनेमा गत चैत १५ गते भएको हिंसात्मक राजावादी आन्दोलनमा संलग्न भएको आरोपमा दुर्गा प्रसाईंसहित ३९ जना प्रतिवादीको थुनछेक बहस अन्तिम चरणमा पुगेको छ।

न्यायाधीश ध्रुवराज कार्कीको इजलासमा प्रतिवादी पक्षको बहस सकिएको छ भने आज सरकारी वकिलले जवाफ दिनेछन्।

राज्यविरुद्धको अभियोगमा ५० जनामाथि मुद्दा दायर गरिएकोमा ११ जना धरौटीमा र ३९ जना हिरासतमा छन्। बहसपछि थुनामा पठाउने वा धरौटीमा छाड्ने निर्णय हुनेछ।

प्रदर्शनका क्रममा आगजनी, तोडफोड र हिंसात्मक गतिविधि भएका थिए। घटनामा एक पत्रकारसहित दुई जनाको ज्यान गएको थियो। प्रहरीले प्रसाईंमाथि प्रहरीलाई कुल्चने गरी गाडी चलाएको आरोप लगाएको छ।