मङ्सिर २६ गते । निर्वाचन आयोगले आज (सोमबार)देखि निर्वाचन आचारसंहिता लागू नहुने जनाएको छ । प्रतिनिधिसभा र प्रदेशसभा निर्वाचनका लागि गत असोज १२ गतेदेखि देशभर निर्वाचन आचारसंहिता लागू गरिएको थियो ।

उक्त आचारसंहिता मङ्सिर २६ गते सोमबारदेखि लागू नरहेको आयोगले जनाएको छ । निर्वाचन आचारसंहिता, २०७९ को दफा १ को उपदफा २ बमोजिम आयोगले आजदेखि आचारसंहिता लागू नरहने निर्णय गरेको हो ।

आयोगका प्रवक्ता एवम् सचिव शालिग्राम शर्मा पौडेलले यसबारे प्रधानमन्त्री तथा मन्त्रिपरिषद् कार्यालय र सम्पूर्ण मन्त्रालयहरु तथा संवैधानिक निकायहरुमा जानकारी गराइसकेको जानकारी दिनुभयो ।

मङ्सिर ४ गते प्रतिनिधिसभा र प्रदेशसभा सदस्य निर्वाचन भएको थियो । आयोगले प्रतिनिधि सभामा निर्वाचित सदस्यहरूको विवरण मङ्सिर २९ गते बिहीबार राष्ट्रपति विद्यादेवी भण्डारीसमक्ष पेश गर्ने तयारी गरेको छ ।