भारतीय गायक तथा अभिनेता लक्की अलीले आफ्नो जग्गा अतिक्रमणका सम्बन्धमा कर्नाटकका डीजीपीसँग सहयोग मागेका छन् । राज्यका गृहमन्त्री अर्गा नायेन्द्रले डीजीपीलाई घटनाको छानबिन गर्न निर्देशन दिएका छन् ।
लक्की अलीको वास्तविक नाम मकसुद महमूद अली हो । लक्की अलीले आफ्नो सामाजिक सञ्जाल पोस्टमा केही भू–माफियाले बेंगलोरमा आफ्ना पुर्खाको तीन एकड जमिन अतिक्रमण गरिएको आरोप लगाएका छन् । उनले अतिक्रमण गर्नेहरूलाई आईएएस अधिकारीको पनि समर्थन रहेको बताए ।
लक्की अलीले आफू कामको सिलसिलामा दुबईमा रहेकाले बेंगलोरमा बस्ने आफ्नो परिवारलाई प्रहरी सुरक्षा दिनुपर्ने पनि बताए । अलीले आफ्नो सोशल मिडिया पोस्टमा आईएएस अफिसर रोहिणी सिन्दुरी, उनका पति सुधीर रेड्डी र भाइ मधुसूदन रेड्डीको नाम लिएका छन् ।
लक्की अलीको आरोपमा आईएएस अफिसर रोहिणी सिन्दुरीले भनिन्, ‘म लक्की अलीको कलाको सम्मान गर्छु, तर मलाई लाग्छ कि यो मुद्दा अदालतमा हुँदा उनको यो पोस्ट बिल्कुलै अनावश्यक थियो । यो मेरो छविलाई क्षती पुर्याउने, अपमान गर्ने र सहानुभूति प्राप्त गर्ने नियतले गरिएको हो ।’
लक्की अलीले पनि यस विषयमा एसीपीलाई गुनासो गरेको तर अहिलेसम्म कुनै प्रतिक्रिया नआएको बताए । उनको परिवार विगत ५० वर्षदेखि यहाँ बस्दै आएको छ ।