पशुपति क्षेत्र विकास कोषले गौशाला चोकमा रहेको मारवाडी सेवा समितिले अवैध रूपमा बनाएको संरचनामा डोजर चलाएको छ ।

विकास कोषको नौ रोपनी १४ आना जग्गामा बनेको भवनसहितको जग्गा कौडीको भाउमा लिजमा लिएर धर्मशाला सञ्चालन गर्दै आएको समितिलाई ३५ दिने समय दिएर अवैध संरचना हटाउन कोषले निर्देशन दिएको थियो । ३५ दिने सूचनाको समय सकिएसंगै कोषले डोजर चलाएको हो ।

कोषको स्वीकृतिबिना धर्मशाला परिसरमा बनेको करिब ४०–५० फिटको एकतले भवनमा समितिले स्वीकृति नलिएर र नक्सा पास नै नगरी तला थप्न थालेपछि उक्त कार्य रोक्न कोषले निर्देशन दिएको हो। कोषका प्रवक्ता रेवतीरमण अधिकारीले मारवाडी सेवा समितिबाट सञ्चालनमा रहेको धर्मशाला परिसरमा अवैध संरचना निर्माण गरेर नाफामूलक कार्य हुन थालेपछि थपिएका संरचना हटाउन निर्देशन दिएको बताए ।