अमेरिकामा जून महिनासम्म कोरोनाभाइरसका कारण दैनिक मृत्यु हुने संख्या हाल १७ सय ५० बाट बढेर करिब तीन हजार हुनसक्ने खुलासा भएको छ ।
अमेरिकाको रोगमाथि नियन्त्रण र त्यसको बचाउका लागि बनेको संस्था सिडिसीको एक आन्तरिक मेमोबाट यस्तो पत्ता लागेको हो । यसलाई न्यूयोर्क टाइम्स पत्रिकाले प्रकाशित गरेको छ ।
यद्यपि, ह्वाइट हाउसले यो रिपोर्टलाई विवादास्पद बताएको छ ।
सिडिसीको रिपोर्टमा मे महिनाको अन्तिमसम्म दैनिक दुई लाख नयाँ संक्रमित भेटिने आशंका भएको भन्दै अधिकारीलाई चेतावनी दिइएको छ । हाल औसतमा २५ हजार नयाँ संक्रमित भेटिएका छन् ।
अमेरिकामा केही राज्यमा लकडाउन खुकुलो बनाउँदा र आर्थिक गतिविधी सुरु भएपछि त्यहाँ कोरोना संक्रमितको संख्यामा वृद्धि भइरहेको छ । वैज्ञानिकका अनुसार यो चिन्ताजनक स्थिती हो र अमेरिकालाई यसबाट बाहिर निस्कन निकै लामो समय लाग्नेछ ।
आइतबार राष्ट्रपति ट्रम्पले अमेरिकामा जम्माजम्मी एक लाख व्यक्तिको मृत्यु हुने आशंका गरिएको बताएका छन् ।
ह्वाइट हाउसका एक प्रवक्ताले सिडिसीको रिपोर्टलाई अस्विकार गर्दै भने, ‘यो न नै ह्वाइट हाउसको रिपोर्ट हो न नै यसलाई कोरोनाभाइरस टास्क फोर्स सामू राखिएको छ र न नै यसलाई सरकारी निकायले यो रिपोर्टमाथि अनुसन्धान गरेको छ ।’
स्रोतः बीबीसी
१.
२.
३.
