पथरी । पथरी शनिश्चरे नगरपालिका–६ मंगलबारे बजारस्थित न्यु थापा सुनचाँदी पसलमा गएराति चोरी भएको छ।

पसलका सञ्चालक विनोद थापाका अनुसार चोरले पसलबाट करिब १२ लाख रुपैयाँ बराबरको सुन, चाँदी र नगद चोरी गरेका छन्।

घटनाबारे जानकारी पाएपछि अस्थायी प्रहरी चौकी कुसलचोक र इलाका प्रहरी कार्यालय पथरीको टोली घटनास्थलमा पुगेर अनुसन्धान थालेको छ।

गान्धि–मनमोहन मार्गसँगै टाँसिएको आफ्नै घरमा थापाले सुनचाँदी पसलसँगै मनी ट्रान्सफर सेवा पनि सञ्चालन गर्दै आएका थिए। प्रारम्भिक अनुसन्धान अनुसार, चोरले घरको छतबाट प्रवेश गरी ढोका फुटाएर भित्र पसेको पाइएको छ।

प्रहरीका अनुसार चोरले सुन, चाँदी र नगद रु ५५ हजार सहित करिब १२ लाख रुपैयाँ बराबरको धनमाल चोरी गरेको अनुमान गरिएको छ। घटनाबारे थप अनुसन्धान जारी छ।