विराटनगर । नुडल्स र स्न्याक्सको उत्पादनमा अग्रणी कम्पनी एशियन थाइ फुड्स लिमिटेड (ATF) ले आफ्नो आगामी प्रारम्भिक सार्वजनिक निष्कासन आईपीओ का लागि निष्कासन प्रबन्धकका रूपमा हिमालयन सेक्युरिटीज बैंकर लिमिटेडलाई नियुक्त गरेको छ। यस सम्झौतासँगै कम्पनी सार्वजनिक बजारमा प्रवेश गर्ने तयारीमा जुटेको छ।

विराटनगरमा आयोजित एक समारोहका बीच एशियन थाइ फुड्सका अध्यक्ष श्री शिवरतन शारडा र हिमालयन सेक्युरिटीज बैंकर लिमिटेडका प्रमुख कार्यकारी अधिकृत श्री सुभास बहादुर श्रेष्ठले सम्झौतापत्रमा हस्ताक्षर गरे। सो अवसरमा एशियन थाइ फुड्सका प्रबन्ध निर्देशक श्री महेश जाजु, कार्यकारी निर्देशक श्री राधेश्याम शारडा र निर्देशक श्री आशिष जाजु लगायत हिमालयन सेक्युरिटीजका नायब महाप्रबन्धक श्री शंकर राजवाहकको पनि उपस्थिति थियो।

यो रणनीतिक साझेदारीले एशियन थाइ फुड्सलाई पुँजी बजारमा प्रवेश गर्न र कम्पनीको विस्तारलाई गति दिन सहयोग पुर्‍याउने विश्वास गरिएको छ।विराटनगर र तौलिहवामा रहेका आफ्ना अत्याधुनिक उत्पादन एकाइहरूमार्फत एशियन थाइ फुड्सले ३० भन्दा बढी देशहरूमा आफ्ना उच्च गुणस्तरका उत्पादनहरू निर्यात गर्दै आएको छ। कम्पनीका लोकप्रिय ब्रान्डहरू जस्तै रमपम, 2PM र प्रिती ले आफ्नो प्रामाणिक स्वादका कारण बजारमा बलियो पहिचान बनाएका छन्।

एशियन थाइ फुड्सका प्रबन्ध निर्देशक श्री महेश जाजुले यस साझेदारीले कम्पनीको विकास यात्रामा एउटा नयाँ अध्याय सुरु भएको बताए। उनले पुँजी बजारमा हिमालयन सेक्युरिटीजको विशेषज्ञताले आईपीओ प्रक्रियालाई सहज बनाउने र यसबाट प्राप्त पुँजीले नवप्रवर्तन र कम्पनीको विश्वव्यापी पहुँचमा थप लगानी गर्न मद्दत पुग्ने विश्वास व्यक्त गरे।कम्पनीले आईपीओको विस्तृत विवरण, समयरेखा र सेयर बाँडफाँट आउने महिनाहरूमा सार्वजनिक गर्ने जनाएको छ।