सुनसरी । सुनसरीको भोक्राहा नरसिंह गाउँपालिका–३ जलुवाटोलस्थित पूर्व–पश्चिम राजमार्गमा आज बिहान भएको सडक दुर्घटनामा तीन जनाको ज्यान गएको छ भने १५ जना घाइते भएका छन्।

जिल्ला प्रहरी कार्यालय सुनसरीका प्रवक्ता डीएसपी योगराज खतिवडाका अनुसार काँकडभिट्टाबाट दिक्तेलतर्फ जाँदै गरेको यात्रुबाहक बस (मे १ ख १७९९) र विपरीत दिशाबाट आइरहेको माइक्रोबस (प्रदेश २–०१–००१ ज ००४७) एकआपसमा ठोक्किँदा दुर्घटना भएको हो।

निधन हुनेहरुको पहिचान अझै खुल्न बाँकी छ भने घाइतेहरुलाई इनरुवा अस्पताल, विराटनगर न्यूरो तथा नोबेल अस्पतालमा उपचार भइरहेको प्रहरीले जनाएको छ। बस चालक झापा अर्जुनधारा नगरपालिका–१ का गोपाल अधिकारीलाई नियन्त्रणमा लिएर घटनाबारे थप अनुसन्धान भइरहेको प्रहरीको भनाइ छ।