काठमाडौं – नेपाली कम्युनिष्ट पार्टीका सहसंयोजक तथा पूर्वप्रधानमन्त्री माधवकुमार नेपाल स्वास्थ्य समस्या देखिएपछि अस्पताल भर्ना भएका छन्।

नेता नेपाललाई बुधबार रुघा, खोकी र ज्वरो देखिएपछि त्रिभुवन विश्वविद्यालय शिक्षण अस्पताल लगिएको थियो। प्रारम्भिक परीक्षणपछि उनलाई मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा भर्ना गरिएको छ।

अस्पताल स्रोतका अनुसार, नेता नेपाललाई रुघा–खोकी र ज्वरोसँगै सास फेर्न गाह्रो हुने (घ्यार–घ्यार) समस्या देखिएको छ। त्रिवि शिक्षण अस्पतालमा क्याबिन उपलब्ध नभएको कारण उनलाई मनमोहन सेन्टरमा राखेर उपचार सुरु गरिएको हो। उपचार त्रिवि शिक्षण अस्पतालकै छातीरोग विशेषज्ञ टोलीले गरिरहेको छ।

बिहीबार बिहान पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’सहित अन्य नेताहरू स्वास्थ्य अवस्थाबारे जानकारी लिन अस्पताल पुगेका थिए।

यसैबीच, त्रिवि शिक्षण अस्पतालको भीआईपी क्याबिन नम्बर ६०१ मा राष्ट्रिय स्वतन्त्र पार्टी (रास्वपा)का सभापति रवि लामिछाने पनि भर्ना रहेको अस्पताल स्रोतले जनाएको छ।