बारा। प्रतिनिधि सभा निर्वाचन अन्तर्गत बारा निर्वाचन क्षेत्र नं. २ मा जनअधिकार पार्टीबाट उम्मेदवारी दिएका पत्रकार अमरेश कुमार पाण्डेय र राष्ट्रिय स्वतन्त्र पार्टी (रास्वपा) बाट उम्मेदवारी दर्ता गराएका चन्दन सिंहबीच कडा प्रतिस्पर्धा देखिएको छ।

रोचक पक्ष के छ भने दुवै उम्मेदवार एउटै वडा र एक–अर्काका छिमेकीसमेत रहेका छन्। स्थानीय तहमा दुवैको सामाजिक पहिचान र पहुँच भएकाले चुनावी माहोल थप चर्किएको छ। पत्रकारितामार्फत लामो समयदेखि स्थानीय मुद्दा उठाउँदै आएका पाण्डेयले सुशासन, पारदर्शिता र जनअधिकारलाई आफ्नो प्रमुख एजेन्डा बनाएका छन्। उनले शिक्षा, स्वास्थ्य, रोजगारी र किसानका समस्या समाधानका लागि संसदमा सशक्त आवाज उठाउने प्रतिबद्धता जनाउँदै आएका छन्।

उता, रास्वपाका उम्मेदवार चन्दन सिंहले वैकल्पिक राजनीति, भ्रष्टाचारविरुद्ध कडा कदम र युवामुखी विकास कार्यक्रमलाई आफ्नो प्राथमिकतामा राखेका छन्। पार्टीको राष्ट्रिय प्रभाव र संगठनात्मक सञ्जालका कारण सिंहले पनि क्षेत्रभित्र उल्लेख्य समर्थन बटुल्दै गएको स्थानीयको भनाइ छ।

स्थानीय राजनीतिक विश्लेषकहरूका अनुसार एउटै समुदाय र छिमेकबाट दुई प्रभावशाली उम्मेदवार मैदानमा उत्रिँदा मत विभाजन हुने सम्भावना बढेको छ, जसले अन्तिम नतिजा झन् अनिश्चित बनाएको छ। दुवै उम्मेदवार घरदैलो, टोलभेला र सार्वजनिक छलफलमार्फत मतदातासँग प्रत्यक्ष संवादमा सक्रिय देखिन्छन्। आगामी निर्वाचन नजिकिँदै जाँदा बारा २ को प्रतिस्पर्धा झनै रोचक बन्दै गएको छ। मतदाताले कसलाई विश्वास गर्ने भन्ने निर्णयले यस क्षेत्रको राजनीतिक दिशा तय गर्ने अपेक्षा गरिएको छ।