काठमाडौं– जनता समाजवादी पार्टीका अध्यक्ष अशोक राईले नेकपा एमालेसँग एकता गर्ने तयारी गरेपछि पार्टीभित्र असन्तुष्टि फैलिएको छ। मधेसवादी दलसँग एकता गर्ने कि कम्युनिस्ट पार्टीसँग जाने भन्ने विषयमा नेताहरू दुई धारमा विभाजित भएका छन्। यही कारणले राई नेतृत्वको जनता समाजवादी पार्टी फुट्न लागेको छ।

गत वैशाखमा अशोक राई र उपेन्द्र यादवबीच विवाद हुँदा जसपा नेपाल फुटेर राईले जनता समाजवादी पार्टी गठन गरेका थिए। तर अहिले राई पक्ष लगातार एमालेसँग संवादमा छ। साथै, जनार्दन शर्माको प्रगतिशील राष्ट्रिय अभियानसँग पनि राई सम्पर्कमा रहेका छन्।

एमाले उपाध्यक्ष पृथ्वी सुब्बा गुरुङका अनुसार, “अशोक राईको पक्ष हाम्रोमा फर्किने तयारीमा हुनुहुन्छ। उहाँहरूसँग छलफल भइरहेको छ।”

राई पक्षले एमालेमा फर्किने निर्णय गरेसँगै मधेस पृष्ठभूमिका केही नेताहरू पुरानो पार्टी जसपा नेपालमा फर्किने तयारीमा रहेका छन्। आइतबार साँझ उपेन्द्र यादव नेतृत्वको जनता समाजवादी पार्टी र महन्त ठाकुरको लोकतान्त्रिक समाजवादी पार्टीबीच एकता भएपछि, प्रदीप यादव, रेनु यादव, नवलकिशोर साह सुडी, वीरेन्द्र महातो लगायतका नेताहरू पुरानो पार्टीमा फर्किन इच्छुक देखिएका छन्।

जसपा नेपालका नेताहरूका अनुसार, उनीहरू मधेसीरका जिल्लामा सभासमेत गरेर जनता समाजवादी पार्टी र लोसपाको एकीकरणपछि पुरानो पार्टीमा फर्किने अभियान चलाउने तयारीमा छन्। रेनु यादवको सचिवालयले पनि बहुमत नेताहरू पार्टी एकीकरणको अभियानमा रहेको जनाएको छ।

केही समयअघि नेता प्रदीप यादवले मधेसी दल र शक्तिहरूलाई बिथोल्ने एकतामा आफू संलग्न नहुने बताएका थिए।