पहिले अभिभावक मोबाइल दिन डराउँथे–केटाकेटी विग्रन्छन् ।
हो, अहिले मोबाइल दिइएको छ, अनिवार्य भयो नै तर, यसले आम रूपमा विद्यार्थीलाई समस्यामा पारेको छ । विराटनगरका विद्यालयहरूमा अध्ययनरत विद्यार्थी अनलाईन कक्षामा अनुपस्थित रहने गरेका छन् तर, उनीहरू मोबाइल फोन भने प्रयोग गरिरहन्छन् । अभिभावक हैरान छन् ।
घण्टौ समयसम्म शिक्षकले बोर्ड मार्फत एकहोरो अध्ययन अध्यापन गराइरहँदा विद्यार्थी झर्को मान्दै कक्षामा अनुपस्थित रहने गरेका छन् । विद्यार्थीको कम्प्युटर, ल्यापटप र मोबाइल स्कुलको शिक्षकको कक्षासँग जोडिएपनि विद्यार्थी कम्प्यूटर, ल्यापटप र मोबाइलमा नबसेर टिभी हेर्ने, आँगनमा घुमफिर गर्ने, दिसा पिसाबको बहानामा घरीघरी कक्षा मिस गरिदिने गरेका छन् ।

कोभिड–१९ महामारीका कारण विराटनगरका सरकारी तथा गैर सरकारी विद्यालयहरूले अनलाईन मार्फत कक्षा संचालन गरिरहेको छ । सरकारले ०७६ साल चैत ११ गतेदेखि देशमा लकडाउन लागु गरेदेखि नै केहि समय पूर्ण रूपमा बन्द रहेको विद्यालय पछि अनलाईन मार्फत कक्षा संचालन गर्न थालेको छ ।
अनलाईन मार्फत नै शैक्षिक सत्र ०७६ को परीक्षा लिएर परीक्षा फारम प्रकासित गरेका विद्यार्थीहरूलाई २०७८ सालको शैक्षिक सत्र को कक्षा अनलाईन मार्फत संचालन गरिरहेको छ । विद्यालयका शिक्षकहरूले आफू अनुकुल कुनै समय विद्यालयमा बसेर अध्ययन अध्यापन गराउँदै आएका छन् भने कुनै समय विद्यालयले आधा तलब दिएको झोँकमा स्कुल नपुगी घरैबाट कक्षा संचालन गर्ने गरेका छन् ।

शिक्षक शिक्षिकाले अनलाईन कक्षा संचालन गर्नु अघि कक्षामा भर्ना लिएका सम्पूर्ण विद्यार्थीहरूको फोटो पनि हेर्छन्, हाजिरी गराउँछन् । शिक्षक शिक्षिका एकोहरो भएर बोर्ड तिर फर्केर पढाइरहँदा आधाभन्दा बढि विद्यार्थी गायब भइसकेका हुन्छन् । अन्तिम अन्तिम क्षणमा सम्पूर्ण मनोरञ्जन गरिसकेर केवल हाजिरीका लागि विद्यार्थी पुनः स्क्रीन अघि प्रकट हुने गरेका छन् ।

शिक्षक शिक्षिकाले पढाइरहँदा अचानक विद्युत अवरोध हुँदा नेट पनि जान्छ । पढाइको शिलशिला विद्युतका कारण तोडिँदा अधिकांश विद्यार्थीले पुनः शिक्षक शिक्षिकासँग जोडिन झर्को मान्ने गरेका छन् । शिक्षक शिक्षिकाले अनुपस्थित रहेका अभिभावकको मोबाइलमा कम्प्लेन पठाउने गरेका छन् । तर अभिभावक कोरोनाको तनावका कारण आफै थलिएको हुँदा शिक्षक शिक्षिकाको कम्प्लेनलाई खासै महत्व दिँदैनन् ।

कोभिड महामारीका कारण सिकायत गरिएका विद्यार्थीलाई प्रत्यक्ष रूपमा स्कुलमै लगेर शिक्षक शिक्षिकाकै अगाडि उभ्याएर कारवाही र दण्ड सजाय गर्ने कुनै अवस्था नभएकाले त्यसको भरपुर फाइदा विद्यार्थीले उठाएका छन् भने विभिन्न बहानामा विद्यालयको असुली धन्दालाई केहि ले पनि नछेकेको भन्दै अभिभावक चिन्तित बन्ने गरेका छन् ।
प्रशानसले विद्यालय बन्द भनेर फुक्यो तर शैक्षिक सत्र २०७८ को आगमनसँगै विद्यालयले जेठ को फिस मिनाहा गरेपनि असारदेखि एकमुष्ठ अग्रिम रकम असुली गरिरहेको छ । के का लागि असुली भनी विद्यालयमा सोधीखोजी गर्दा विद्यार्थी भर्ना र अनलाईन कक्षा संचालन भन्दै रकम माथि रकमको ताकेता गरिरहेको छ । अनलाईन मार्पmत अध्ययन गरिरहेका विद्यार्थीका प्रत्येक अभिभावकले कोभिडको जोखिमा पनि ऋण खोजेर भएपनि विद्यार्थीको भर्ना शुल्क भुक्तानी गरिरहेको छ ।

यसबाहेक विद्यार्थीको किताबदेखि लिएर अनलाईन पढ्नका लागि कम्प्यूटर, नेट अनिवार्य भएकोले अभिभावकले तनावमा रहँदै खोजखाज गरेर मोटो रकमको जोगाड गरेका छन् । विद्यालयले विद्यार्थीहरूबाट मासिक रूपमा मोटो रकम असुली गरेपनि शिक्षक शिक्षिकालाई अनलाईन मार्फत कक्षा संचालन गरेको भन्दै आधा तलब मात्रै दिने गरेको छ ।
शिक्षक शिक्षिकाले जति रकम पाएका छन् त्यतिनै अध्ययन अध्यापन गराउने मूडमा रहेकाले गुणस्तरीय शिक्षा बाट विद्यार्थी बञ्चित छ । शिक्षक शिक्षिकाले आफू अनुकुल भएको बेला विद्यालयमा पढाउने र झर्को र तनाव भएको बेला घरैबाट पढाउने, कहिलेकाँही रूघाखोकी लाग्यो भनेर कक्षा नै संचालन नगर्ने प्रवृत्ति कम तलबको उपज हो ।

यो लेख आजको न्यु सृष्टि दैनिक पत्रिकामा प्रकाशित छ।