प्रतिनिधिसभा विघटन गर्ने प्रधानमन्त्री केपी शर्मा ओलीको कदमविरुद्ध आयोजना हुने पालिकास्तरीय विरोध र्याली र सभामा सहभागी हुन नेपाली काँग्रेस ललितपुर महानगर समितिले आग्रह गरेको छ । काँग्रेस केन्द्रीय समितिले माघ ३ गते देशभरका ७ सय ५३ वटै पालिकामा संसद विघटनविरुद्ध विरोध र्याली तथा विरोध सभा गर्ने भएको छ । उक्त कार्यक्रममा पार्टीका संगठित सदस्य,भातृ संगठन,शुभेच्छुक संगठनका सदस्यलगायतलाई अनिवार्य सहभागी हुन काँग्रेसले अपिल गरेको हो ।
‘केन्द्रीय समितिको निर्णय र निर्देशनमा देशैभरका ७ सय ५३ पालिकाहरूमा शान्तिपूर्ण विरोध र्याली तथा सभा आयोजना गर्ने हुँदा त्यस इकाईअन्तर्गत सम्पूर्ण क्रियाशील सदस्यहरू,भातृ संगठनका सदस्यहरू,शुभेच्छुक संस्थाका सदस्यहरू र पार्टीप्रति आस्था राख्नुहुने महानुभावहरूलाई शनिबार सहभागिता जनाउन सक्रिय पहलका लागि अनुरोध गर्दछौँ’,काँग्रेसले भनेको छ ।
काँग्रेसले प्रतिनिधिसभा विघटन गर्ने प्रधानमन्त्री ओलीको कदमलाई अधिनायकवादी,सर्वसत्तावादी,निरङ्कुश र स्वेच्छाचारी चरित्र भन्दै देशव्यापी आन्दोलन गरिरहेको छ । उसले यसअघि नै प्रदेश निर्वाचन क्षेत्र हुँदै वडा तहसम्मको आन्दोलनको कार्यक्रम घोषणा गरेको थियो ।