बुटवल। नेकपा (एमाले)को भ्रातृ संगठन युवा संघ नेपाल, रुपन्देहीले समाजमा हिंसा भड्काउने अभिव्यक्ति दिएको आरोपमा **डा. कमल भूसाल (निकोलस)**लाई तत्काल पक्राउ गरी कानूनी कारबाही गर्न माग गरेको छ।

आइतबार बसेको संघको बैठकले भूसालले एमाले अध्यक्ष केपी शर्मा ओलीलगायतका नेताहरूको घरमा आगो लगाउने र घेरा हाल्नेजस्ता हिंसात्मक अभिव्यक्ति सार्वजनिक गरेको भन्दै आपत्ति जनाएको हो।

संघका अध्यक्ष कृष्ण कुमालका अनुसार, “भूसालमाथि तत्काल कारबाही नगरेसम्म रुपन्देही प्रवेशमा रोक लगाउने निर्णय गरिएको” छ। उनले प्रहरी प्रशासनले कदम चाल्न ढिलाइ गरे युवा संघ आफैंले आवश्यक कदम चाल्ने चेतावनी पनि दिएका छन्।

संघका इन्चार्ज केशव रोक्काले समाजमा विखण्डनकारी, अराजकता फैलाउने र हिंसा भड्काउने अभिव्यक्ति दिने व्यक्तिहरूलाई कानूनी दायरामा ल्याउनुपर्ने बताएका छन्।

डा. भूसाल रुपन्देहीको सैनामैना निवासी हुन्।